Žemaitē itrauktė i CLDR
CLDR (en. The Unicode Common Locale Data Repository) ī doumenū saugīkla, katruo sodietė kalbū standartā. Anėi nauduojamė vėsam svietė pārgoldėmams a kėtēp luokalėzoutė pruogramas. I anon veiz:
- Apple (macOS, iOS, watchOS, iTunes ė kt.)
- Google (paėiška, Chrome, Android, Google Maps ė kt.)
- Meta (Facebook, Messenger, WhatsApp ė kt.)
- Microsoft (Windows, Office, Visual Studio ė kt.)
- ė daug daug kėtū
So 48 ėšleidėmo, katras bova spalė 29 dėina, žemaitiu kalba ėrgė bova itraukta i ton saugīkla. Pavīka pradiuo tik pagrindėnēs dalīkās, kāp nuruodont regijuona, līkavėma taislio (itraukont dvėskaita), majednės žemaitiu ruodbalsės. Baisē gera pradė, katruos parėngėms ožtroka vėrš metu. Dabā tik ivestė daugiau standartizoutu vertėmu ė veizieket nȧtroks ė telepuonūs turiesma žemaitiu kalba so „ė̄“.